Tá foirgnimh agus bonneagar inrochtana riachtanach má tá paisinéirí faoi mhíchumas luaineachta chun seirbhísí muiriompair paisinéirí a rochtain agus a úsáid ar shlí atá sábháilte, slán agus muiníneach.
Maidir le roinnt mhaith foirgneamh agus bonneagair, is féidir é bheith dúshlánach feabhas a chur ar a n-inrochtaineacht, go háirithe saoráidí atá níos sine nó foirgnimh oidhreachta. D'fhéadfadh nach mbeadh smacht i gcónaí ag oibreoirí post, cuanta agus céanna ar gach cuid de shuíomh ar leith, agus go mbeadh orthu idirchaidreamh a dhéanamh le húdaráis áitiúla nó le páirtithe leasmhara eile. Beidh tionchar ag méid agus fairsinge na saoráide agus nádúr na seirbhísí a sholáthraítear ag an suíomh sin ar cé chomh praiticiúil is a bheadh sé feabhsú inrochtaineachta a dhéanamh. Ba chóir d'oibreoirí dul ar aghaidh le bearta praiticiúla indéanta cun inrochtaineacht a fheabhsú sa ghearrthéarma, fad is a bhíonn clár inrochtaineachta níos fadtéarmaí á bhunú acu chun dúshláin ar bith nár déileáladh leo fós a shárú. Tá sé ríthábhachtach go ndéanfaí foirgnimh nua nó athchóiriú a dhearadh, a thógáil agus a bhainistiú de réir na gcleachtas inrochtaineachta is fearr.
Tá ceanglais an Cód idirnáisiúnta um shlándáil long agus port sainordaitheach faoin dlí naisiúnta agus idirnáisiúnta. Tá sé tábhachtach nach gceapfaí go bhfuil ceanglais slándála an Chóid ag teacht trasna ar sholáthar leibhéal cuí inrochtaineachta. Tá ceanglais slándála dá leithéid ann sna córais iompair eile, go háirithe san aeriompar. Trí rochtain mhíchumais a lánpháirtiú i bpleanáil agus i gcur chun feidhme na slándála, agus trí oiliúint chomhionannais mhíchumais (chomh maith le slándáil) a thabhairt don fhoireann ar fad, is féidir torthaí maithe a bhaint amach.
Is féidir le hoibreoirí, i gcomhar le gníomhaireachtaí eile de pháirtithe leasmhara, mórán a dhéanamh chun rochtain ar fhoirgnimh, ar theirminéil agus ar phointí bordála a fheabhsú. Is í aidhm na caibidle seo treoirlínte a thabhairt maidir leis na feabhsuithe seo a dhéanamh.
Ní thugann na treoirlínte seo aghaidh ar an gceist straitéiseach: dearadh bealaí agus gréasáin. Aithnítear go mbíonn fadhbanna ag go leor daoine maidir le muiriompar paisinéirí a úsáid toisc go bhfuil an turas ón mbaile go dtí an críochphort farantóireachta, cuan nó cé ró-dheacair. Cé go mbaineann an fhadhb seo le mórán daoine, baineann sé ar bhealach i bhfad níos mó leo siúd atá faoi mhíchumais a bhfuil fadhbanna luaineachta acu. Tá teorainn leis an méid is féidir le hoibreoirí dul i ngleic leis an gceist seo, ach nuair a bhíonn deis ann athchóiriú a dhéanamh ar na bealaí agus ar an ngréasán, ba chóir breathnú ar an ngá atá le seirbhísí a thabhairt chomh gar do phaisinéirí agus is féidir. Ba chóir d'oibreoirí idirchaidreamh a dhéanamh leo siúd go léir a bhfuil ról acu maidir le rochtain ar sheirbhísí muiriompair a fheabhsú - lena n-áirítear tacsaithe / fruilchairr agus soláthróirí iompair eile: poiblí, príobháideach, pobail, deonach agus speisialta.
Ní seirbhísí 'ó dhoras go doras' a chuireann muiriompar paisinéirí ar fáil. Chun teacht ar theirminéal nó pointe bordála, bíonn ar fhormhór na bpaisinéirí siúl nó rothaíocht a dhéanamh, cathaoir rothaí a úsáid nó taisteal i gcarr, i mbus nó i dtraein. Dá bhrí sin tá tábhacht le socruithe chomhtháite rochtana maidir le an féidir le paisinéirí faoi mhíchumas luaineachta úsáid a bhaint as seirbhís loinge nó farantóireachta.
Feabhsaítear an rochtain má chuirtear doirse teirminéal chomh gar agus is féidir do na soithí ar a ndéanann siad freastal, toisc go n-íoslaghdaítear an méid siúlóide. Ba chóir d'oibreoirí bealaí rochtana agus suíomh na stadanna iompair phoiblí, páirceáil carr, saoráidí ticéad agus saoráidí eile a iniúchadh i gcomhairle le páirtithe leasmhara áitiúla chun a áirithiú go bhfreagraíonn siad riachtanais gach custaiméara.
Is ar na húdaráis áitiúla go príomha atá an dualgas an rochtain ar theirminéil a fheabhsú, trí cosáin, crosairí agus soilsiú a sholáthar, uaireanta le hionchur ón nGarda Síochána, mar is fíor annamh gur leis na hoibreoirí an bonneagar máguaird. De ghnáth, dá bhrí sin, má bhíonn feabhas le cur ar chalafoirt farantóireachta, cuanta, céanna agus ionaid tuirlingthe, beidh baint ag níos mó ná aon ghníomhaireacht amháin leis an scéal.
Tá ról tábhachtach ag oibreoirí iompair i dtionscnaimh ilghníomhaireachtaí dá leithéid, a d'fhéadfadh baint a bheith ag an Roinn Iompair, an Roinn Comhshaoil, Oidhreachta agus Rialtais Áitiúil, údaráis áitiúla agus An Garda Síochána leo freisin.
Nuair a bhíonn calafoirt farantóireachta, cuanta, céanna agus ionaid tuirlingthe á ndearadh agus á gcothabháil, ba chóir d'oibreoirí breathnú ar na pointí seo a leanas, atá criticiúil maidir le bonneagar iompair inrochtana ardchaighdeáin a fhorbairt:
Tagtar ar fhoirgnimh mhuiriompair paisinéirí i slite éagsúla lena n-áirítear de chos nó i gcathaoir rothaí, i gcarr (fágáil nó páirceáilte), nó trí mhodhanna iompair phoiblí eile lena n-áirítear busanna, iarnród, tacsaithe agus fruilchairr agus seirbhísí speisialta iompair eile. Is é an prionsabal ginearálta ná gur chóir go mbeadh an bealach isteach inrochtana, is cuma conas a shroicheann an paisinéir an críochfort.
Ba chóir d'oibreoirí a áirithiú, maidir leis na bealaí isteach agus an áit mórthimpeall an teirminéil nó pointe bordála, go mbeidh siad marcáilte go soiléir agus soilsithe go maith, ionas go mbeidh a fhios ag paisinéirí cá bhfuil siad ag dul.
Maidir leis an rochtain ar fhoirgnimh agus teirminéil mhuiriompair paisinéirí, an bealach chucu agus an chúrsaíocht istigh iontu, ba chóir breathnú go cúramach orthu nuair a bhíonn dearadh nó tógáil ar siúl, i gcás foirgneamh agus bonneagair atá nua nó ann cheana, . Sa mhír 'An chéad chéim eile' ag deireadh na caibidle seo aibhsítear foilseacháin a thugann treoir níos mionsonraithe faoi conas na timpeallachtaí seo a dhéanamh níos inrochtana.
Bheadh oibreoirí ábalta tionscnaimh amhail seirbhísí eolais agus díolacháin ticéad bunaithe ar an nguthán agus bunaithe ar an ngréasán a thabhairt isteach, ionas nach mbeadh ar a gcustaiméirí teacht isteach go pearsanta ina bhfoirgnimh chomh minic sin. Maidir le tionscnaimh dá leithéid, ámh, ba chóir go ndéanfaidís modhanna cumarsáide eile a chomhlánú ach gan a n-áit a thógáil.
Chun inrochtaineacht a fheabhsú do gach úsáideoir, caithfear féachaint ar an bhfoirgneamh atá i gceist ina iomláine, agus a áirithiú go mbreathnaítear ar na réimsí seo a leanas go léir:
Má chruthaítear deacrachtaí fisiceacha le bonneagar agus foirgnimh atá ann cheana, ba chóir díriú ar dtús ar na gnéithe inrochtaineachta is éasca a sholáthar. B'fhéidir go gcaithfidh oibreoirí níos mó béime a chur ar chúram custaiméirí chun teacht timpeall ar na constaicí a eascraíonn as rochtain lochtach fisiceach.
Tá tionchar mór ar inrochtaineacht na timpeallachta ag an tslí a dhéantar na foirgnimh agus na teirminéil a bhainistiú ó lá go lá. Mar shampla, d'fhéadfadh nach mbeadh úsáideoir cathaoireach rothaí ábalta úsáid a bhaint as seomra folctha maith mór inrochtana dá mbeadh sé in úsáid freisin chun cathaoireacha breise nó trealamh glanta a stóráil. D'fhéadfadh bealach inrochtana éirí dorochtana, má bhíonn rópaí nó trealamh eile sa tslí. Tá sé tábhachtach go mbeadh bainistiú na hinrochtaineachta ina chuid dá p(h)ost ag gach duine, agus go mbeadh sé luaite i jabthuairiscí, seicliostaí, nósanna imeachta sábháilteachta agus mar sin de.
Bíonn cead pleanála ag teastáil le haghaidh idirghabhálacha amhail mionathruithe ar fhoirgnimh oidhreachta nó ar fhoirgnimh liostaithe, fiú cinn bheaga amhail scáthláin a shuiteáil. Ba chóir é seo a chur san áireamh i gcláir feabhsaithe. Ba chóir d'oibreoirí oibriú i gcomhpháirtíocht le húdaráis phleanála chun réitigh chothroma a fháil. Maidir le saoráidí nua a bheith á ndearadh, leagann rialacháin fhoirgníochta Cuid M amach na ceanglais íosta. Baineann sé le dea-chleachtas, ámh, má bhíonn saoráidí nua á ndearadh, breathnú ar níos mó ná na ceanglais íosta bhunúsacha; ardchaighdeán inrochtaineachta a chur san áireamh ón tús; agus cúrsaí a éascú d'úsáideoirí, is cuma cén aois, méid, cumas nó míchumas. Cuireann Tógáil do Chách, foilseachán leis an NDA, treoir phraiticiúil ar fáil do dearthóirí maidir leis seo. Nil gach ailtire nó gach innealtóir ina s(h)aineolaí ar cheisteanna inrochtaineachta, agus b'fhéidir go mbeadh ar oibreoirí comhairleoirí gairmiúla saineolaíocha a fhostú chun a áirithiú go mbeidh saoráidí nua nó cinn nuachóirithe leagtha amach chun a bheith inrochtana ag cách.
Ba chóir go mbeadh an nós imeachta comhairliúcháin agus cinnteoireachta, maidir le feabhsuithe nó le tionscadail nuachóirithe, cosúil leis an nós imeachta maidir le foirgnimh nua (féach Tógáil do Chách, foilseachán leis an NDA). Ba chóir breathnú ar na roghanna malartacha: feabhas suntasach ar inrochtaineacht thar thréimhse ghearr ama; nó sraith feabhsuithe nach bhfuil chomh suntasach sin thar thréimhse níos faide ama - d'fhéadfadh an feabhas suntasach a bheith níos fearr ó thaobh luach ar airgead.
Tá an comhéadan idir an long agus an Tír Mor criticiúil maidir le rochtain míchumais mhaith a sholáthar agus is é an réimse is minice a bhíonn míshásúil. Tá roinnt deacrachtaí sainiúla inrochtaineachta sa réimse seo, lena n-áirítear dromchlaí fliucha, dromchlaí sleamhaine (ón fheamainn agus algaí), suíomhanna nochta (gaoth láidir agus báisteach), comhathruithe móra taoide agus gluaiseacht de dheasca tonnta. De ghnáth úsáideann paisinéir coise stangairt chun dul ar bord an tsoithigh agus chun díbhordála. Tá leagan amach stangairt na bpaisinéirí an-tábhachtach maidir le:
Ar bhád farantóireachta (soitheach Ro-Ro), is féidir le paisinéirí coise agus le húsáideoirí cathaoireacha rothaí dul ar bord via na rampaí carr cinn agus deiridh. Ag saoráidí poirt agus ar shoithí tá sé riachtanach go mbeadh comharthaíocht shoiléir ann agus go mbeadh na siúláin marcáilte go soiléir chun a áirithiú go ndéantar na paisinéirí coise a dheighilt go sábháilte ó na feithiclí. Má bhíonn córais rochtana dá leithéid á gcur chun feidhme, caithfidh oibreoirí aghaidh a thabhairt ar shaincheisteanna na bpaisinéirí faoi mhíchumas luaineachta - mar shampla, d'fhéadfadh paisinéirí le lagú radhairc bheith i mbaol níos mó de dheasca gluaiseachtaí feithiclí in áiteanna ina mbíonn paisinéirí agus feithiclí le chéile.
Is féidir leis an iniúchóireacht a bheith an-tábhachtach i roinnt slite. Is féidir leis an iniúchóireacht cabhrú le hoibreoirí, rialtóirí agus paisinéirí chun a fháil amach cé chomh inrochtana is atá na soithí, an bonneagar agus na foirgnimh atá ann cheana, cé chomh héifeachtach is atá na feabhsuithe inrochtaineachta agus cé na deiseanna atá ann le haghaidh feabhsuithe inrochtaineachta breise. Ba chóir go bhfostófaí iniúchóirí inrochtaineachta gairmiúla chun an cineál seo oibre a dhéanamh.
Ba chóir don iniúchadh rochtana:
D'fhonn a áirithiú go mbeidh an caighdeán inrochtaineachta is airde sa timpeallacht thógtha, caithfidh an t-iniúchadh roinnt eilimintí riachtanacha a chur san áireamh, amhail: